Uf em Kisplaz visevi fum Banhof stot en
alte Omnibus. "Extrafahrt" heists uf em Schild über de Vindschuzschibe,
aber um d Pnö vachse Margritli und Kamileblüete. De Lagg, vu einisch blau glänzt
het, isch stumpf. Dur es kabuts Feister regnets ine, und di sunnebleichte Plastigpolster
spiegle sich im Regevasser uf em Bode. For zvöi Jor het in en Schoför fu de Busgselschaft
do ane gstelt. En Ma isch zum Schoför ine gstige und het gseit: "Ich far
mit dem Bus uf Abu Dhabi und schlo in für en par Tusiger los. Det unde sind
derigi Büs gsuecht, und in Abu Dhabi vird de Bus no zä Jor fare." De Ma
isch en Ogasionshandler gsi.
"O, uf Abu Dhabi!" het de Bus
gschvermt. Fu dem Tag a het er jede Morge uf de Ogasionshändler gvartet. Doch
de het sich Zit glo. Er isch di nechsti Vuche nid ko und au de nechsti Monet
nid. De Vinter het de Küeler mit ere Schneedeki überzoge. Den sind im Garte
nebedra d Schneglöggli dur de Schnee broche, den händ d Tulpe blüet.
En Musfamilie isch izoge und het im
hinterste Siz fum Vage ires Nest bout. Ven de Bus Selbstgspröch gfuert het, händ
di drü Muskinder d Ore gspizt. Vu si ghört händ, das de Bus noch Abu Dhabi fare
vil, sind si uf de Polster umetanzt und händ pipst: "Mir vend au uf Abu
Dhabi, mir vend au uf Abu Dhabi!"
De Bus het fu früener tröimt, fu dere Zit,
vun er no en eigne Schoför gha het. De het jede Morge sin Tank ufgfüllt. Am sächsi
isch de ersti Zug id Stat gfare, und de Bus het müese d Arbeiter zum Banhof
bringe. Am achti den hets so fil Lüt i sim Inere gha, das si enand uf d Fües
trampet sind. "De isch mir de Nomitag lieber gsi", het de Bus denkt,
"ven i nume ha müese e par Dame zum Banhof kuciere."
"Doch i bi elter vorde", het de Bus
viter grüblet. "Uf minere Linie 'Ackerzelg-Bahnhof' isch en nöie Bus
uftaucht, und d Lüt händ afo über mi schimpfe. 'Schütelbecher' händ si zuemer
gseit. Au min Schoför het mi nüme möge, den er het Kraft brucht, um mich z stüre.
Einisch amene Morge het er den s Schild 'AckerzeIg-Bahnhof' abmontiert und defür
s Schild 'Extrafahrt' befestiget. Die 'Extrafahrt' het aber nume um de Banhof
ume uf de Kisplaz do gfüert, und do ston i jezt und varte. D Kaz het sogar mini
Müsli fertribe, und so bin i elei."
D Lüt, vu hinter dem Kisplaz gvont händ, händ
sich gschämt vege dem alte Bus for irem schöne Blok. Zäme händ si en Protestbrief
an Gmeindpresident gschribe. De Gmeindpresident het im Ogasionshändler telifoniert,
und de isch schu am nechste Tag uf em Kisplaz erschine.
"Entli vird i usepuzt", het de Bus
denkt und het ufgschnufet, "und den gots ab uf Abu Dhabi." Aber de Ogasionshändler
het nume d Schinverfer abmontiert. En Vuche spöter het de Lastvage funere Autoabbruchfirma
de Bus abgholt. I de Fabrikhalle händ d Arbeiter d Pnö abschrubt. En risigi Pressi
het de ganz Bus zämedrükt, das d Feisterschibe usegspliteret sind. Und den isch
de Bus in Schmelzofe gschobe vorde.
"Ade Abu Dhabi!" het do de Bus gsüfzget.
Sis Ise isch glüeig vorde, und er het gspürt, vien er schmilzt und in Grund fum
Ofe flüst.
Keine Kommentare:
Kommentar veröffentlichen